नाचणी, शेंगदाणे आणि चणेच ठरू शकतात मुलांसाठी खरे पोषण!

मुंबई / पी आर न्यूज मिडिया नेटवर्क 

मुलांच्या उंची, वजन, मेंदूचा विकास आणि रोगप्रतिकारक शक्ती वाढविण्याच्या दाव्यांसह बाजारात विविध हेल्थ ड्रिंक्स, सप्लिमेंट्स आणि पौष्टिक पावडरची मोठ्या प्रमाणावर विक्री होत आहे. आकर्षक जाहिराती आणि सेलिब्रिटींच्या प्रचारामुळे अनेक पालक आपल्या मुलांच्या आरोग्यासाठी महागडी उत्पादने खरेदी करतात. मात्र पोषणतज्ज्ञांच्या मते, या उत्पादनांमध्ये असलेले बहुतांश पोषक घटक घरगुती आणि स्वस्त अन्नपदार्थांमधूनही मिळू शकतात.

अनेक हेल्थ ड्रिंक्समध्ये प्रथिने, कॅल्शियम, जीवनसत्त्वे, खनिजे, फायबर आणि इतर पोषक घटक असतात. मात्र हेच घटक नाचणी, शेंगदाणे, हरभरा, मूग, मटकी, तीळ, गूळ, दूध, अंडी आणि हंगामी फळांमधून नैसर्गिक स्वरूपात मिळू शकतात. त्यामुळे गरीब आणि मध्यमवर्गीय कुटुंबांसाठी हे पदार्थ अधिक परवडणारे पर्याय ठरू शकतात.

आरोग्य क्षेत्रातील तज्ज्ञांच्या मते, मुलांच्या शारीरिक विकासासाठी केवळ हेल्थ ड्रिंक पुरेसे नसून संतुलित आहार, नियमित व्यायाम, सूर्यप्रकाश आणि पुरेशी झोप यांचीही तितकीच गरज असते. बाजारात उपलब्ध असलेल्या अनेक उत्पादनांमध्ये प्रति सर्व्हिंग प्रथिनांचे प्रमाण मर्यादित असते, तर एक अंडे, मूग, हरभरा किंवा शेंगदाणे यांसारख्या पदार्थांतून तुलनेने अधिक प्रथिने मिळू शकतात.

ग्रामीण भागात पूर्वी मुलांना नाचणीची सत्व, शेंगदाणा-गूळ लाडू, मोड आलेली कडधान्ये, दूध आणि ताक दिले जात असे. या आहारामुळे मुलांची वाढ चांगली होत असल्याचे ज्येष्ठ नागरिक सांगतात. त्यामुळे आजही अनेक आहारतज्ज्ञ नैसर्गिक अन्नाला प्राधान्य देण्याचा सल्ला देतात.

दरमहा हेल्थ ड्रिंक्सवर खर्च होणाऱ्या शेकडो रुपयांमध्ये शेंगदाणे, चणे, नाचणी, गूळ, तीळ आणि हंगामी फळे खरेदी करून मुलांना अधिक नैसर्गिक आणि संतुलित पोषण देता येऊ शकते, अशीही चर्चा पोषण क्षेत्रात होत आहे.

"पोषण बाटलीत किंवा पावडरमध्ये नसून आपल्या स्वयंपाकघरातच आहे," असे मत अनेक आहारतज्ज्ञ व्यक्त करत आहेत.

विशेष म्हणजे, अंगणवाडी आणि शालेय पोषण आहार योजनांमधून दिले जाणारे अनेक पदार्थ हे नैसर्गिक पोषणाचे चांगले स्रोत मानले जातात. त्यामुळे पालकांनी केवळ जाहिरातींना भुलून महागडी उत्पादने खरेदी करण्याऐवजी मुलांच्या दैनंदिन आहारात पौष्टिक धान्ये, कडधान्ये, फळे आणि भाज्यांचा समावेश वाढवावा, असे आवाहन आरोग्य तज्ज्ञांकडून करण्यात येत आहे. काही अंगणवाड्या आहार देताना स्वच्छता व काळजी घेत नसल्याने पालक नाराजी व्यक्त करत आहेत. तर अंगणवाड्या कर्मचारी सांगत आहेत की, आम्हाला आहाराचा पुरवठा खराब येतो त्यामुळे आम्ही काय करणार ? असा सवाल करत आहेत.

पी आर न्यूज मिडिया नेटवर्क 

7021777291