इराणमध्ये बहाई समुदायाविरोधात द्वेष पसरवण्याचे आरोप

      राष्ट्रीय संकटाच्या पार्श्वभूमीवर दडपशाही वाढल्याचा इशारा

मुंबई / रमेश औताडे 

इराणमध्ये सुरू असलेल्या सामाजिक, आर्थिक आणि राजकीय अस्थिरतेच्या पार्श्वभूमीवर बहाई समुदायाला बकरा बनवून त्यांच्याविरोधात द्वेष पसरवला जात असल्याचा गंभीर आरोप बहाई इंटरनॅशनल कम्युनिटी ने केला आहे. राज्यनियंत्रित माध्यमांमधून खोटे आरोप, बदनामी आणि दबावाखाली घेतलेल्या तथाकथित “कबुल्या” प्रसारित केल्या जात असल्याने बहाई समुदायावरील दडपशाही धोकादायक टप्प्यावर पोहोचल्याचे बीआयसी ने म्हटले आहे.

गेल्या आठवडाभरात इराणच्या सरकारी चॅनेल्सवर बहाई नागरिकांविरोधात बनावट आरोप प्रसारित करण्यात आले. यासोबतच अटक आणि नजरकैदेत वाढ झाल्याचेही अहवाल आहेत. विशेष म्हणजे १ फेब्रुवारी २०२६ रोजी इस्लामिक रिपब्लिक ऑफ इराण ब्रॉडकास्टिंग या संस्थेने दबाव व सक्तीखाली घेतलेल्या दोन बहाई नागरिकांच्या “कबुल्या” प्रसारित केल्या. मानवी हक्क संघटनांनी अशा प्रकारच्या सक्तीच्या कबुल्यांची पद्धत पूर्वीपासून नोंदवली असून, पुराव्याविना केलेले हे प्रसारण दशकांपासून सुरू असलेल्या छळाची गंभीर वाढ असल्याचे त्यांनी नमूद केले आहे.

बीआयसीच्या संयुक्त राष्ट्रांतील प्रतिनिधी सिमिन फहांदेज यांनी सांगितले की, “इराण सरकारकडून सत्य लपवण्याचा आणि तरुणांना दिशाभूल करण्याचा हा आणखी एक प्रयत्न आहे. प्रत्येक राष्ट्रीय संकटात—सामाजिक, आर्थिक किंवा राजकीय—बहाई समुदायावर खोटे आरोप करून त्यांना लक्ष्य केले जाते. समन्वयित चुकीची माहिती आणि द्वेषमोहिमांद्वारे त्यांना बकरा बनवले जाते.”

दरम्यान, देशात न्याय आणि राष्ट्रीय पुनरुत्थानाची मागणी करणाऱ्या नागरिकांच्या आंदोलनांना हिंसा व दडपशाहीने उत्तर दिले जात असल्याचेही बीआयसीने म्हटले आहे. आंतरराष्ट्रीय समुदायाने या प्रकरणाकडे गांभीर्याने पाहावे, बहाई समुदायाविरोधातील छळ थांबवावा आणि मानवी हक्कांचे संरक्षण सुनिश्चित करावे, अशी मागणी करण्यात आली आहे.