महिला सक्षमीकरणाकडे 'पिंक रिक्षां'ची वाटचाल
महिला सक्षमीकरणाकडे 'पिंक रिक्षां'ची वाटचाल
मुंबई / रमेश औताडे
महिलांना स्वयंरोजगाराचे आणि आर्थिक स्वातंत्र्याचे बळ मिळावे या उद्देशाने, रोटरी क्लब ऑफ बॉम्बे पियर आणि रोटरी डिस्ट्रिक्ट ३१४१ च्या अध्यक्षा रोटेरियन नुपूर देसाई यांनी गरजू आणि पात्र महिलांना 'पिंक रिक्षा' चे वाटप केले. हा उपक्रम महिला सक्षमीकरणाच्या दिशेने एक महत्त्वाचे पाऊल ठरला आहे.
या 'पिंक रिक्षा' उपक्रमाचा मुख्य उद्देश गरजू महिलांना सन्मानाने उपजीविका कमावण्याचे साधन उपलब्ध करून देणे हा आहे, ज्यामुळे त्या आर्थिकदृष्ट्या आत्मनिर्भर होऊ शकतील. रिक्षा चालवण्याचे प्रशिक्षण पूर्ण केलेल्या आणि स्वतःच्या पायावर उभे राहण्याची इच्छा असलेल्या निवडक महिलांना या रिक्षा प्रदान करण्यात आल्या. या रिक्षा केवळ प्रवासाचे साधन नसून, महिलांसाठी आत्मसन्मान आणि सुरक्षित भविष्याची गुरुकिल्ली आहेत.
नुपूर देसाई यांच्या दूरदृष्टी आणि नेतृत्वाखाली हा प्रकल्प यशस्वी झाला. रोटरी क्लब ऑफ बॉम्बे पियर नेहमीच समाजातील वंचित घटकांना मदत करण्यासाठी अग्रेसर राहिला आहे, आणि 'सेवा परमो धर्म' या रोटरीच्या तत्त्वज्ञानाचे दर्शन या उपक्रमातून घडले.
रिक्षा वाटपाच्या वेळी उपस्थित महिलांच्या चेहऱ्यावर एक नवा आत्मविश्वास आणि आनंद स्पष्टपणे दिसत होता. या रिक्षांमुळे त्यांच्या कुटुंबाच्या उत्पन्नाला हातभार लागणार असून, ते एक चांगले जीवन जगू शकतील, असा विश्वास त्यांनी व्यक्त केला.
Comments
Post a Comment